යුද බිය නිමාවී අදට වසර 15යි
මව්බිමේ ඒකීයභාවය හා භෞමික අඛණ්ඩතාව සුරකිමින් කුරිරු ත්රස්තවාදය මෙරටින් අතු ගා දමා අදට වසර 15 ක් සපිරෙනවා.
අනාගත පරපුරට සාමකාමී රටක් දායාද කරන්නට විරෝධාර රණවිරුවන් තම ඇස්, ඉස්, මස්, ලේ පමණක් නොව ජීවිතද පරිත්යාග කළා.
ඒ ඉතිහාස ගතවූ යුද ජයග්රහණය 2009 වසරේ අද වැනි දිනෙක නන්දිකඩාල් කලපුවෙන් සනිටුහන් කරමින් යළිත් ත්රස්තවාදයකට මේ බිමෙහි කිසිදු ඉඩක් නොමැති බව අපේ වීරෝදාර රණවිරුවන් ලොවටම පෙන්වා දුන්නා. එම විජයග්රහණයට උර දුන් සියලු රණවිරුවන් මේ මොහොතේ අප සිහිපත් කරන්නේ ඔවුන් ඉටු කළ අමිල මෙහෙවරට ගෞරවයක් එක් කරමින්.
2007 වසරේ මාවිල්ආරු සොරොව්ව වසා දමමින් ජනතාවට ජලය ලබාදීම අවහිර කළ කොටි නායක වේලුපිල්ලේ ප්රභාකරන් එල්ටීටීඊ යේ ම්ලේච්ඡත්වය යළිත් ඉස්මතු කර පෙන්වනු ලැබුවා. ඊට නිසි පිළිතුරු දෙමින් මානුෂීය මෙහෙයුම ඇරඹූ රණවිරුවන් නැගෙනහිර ත්රස්ත ග්රහණයෙන් මුදා ගනිමින් එල්ටීටීඊ යට පළමු පරාජය අත්කර දුන්නා.
ඉන් අනතුරුව උතුරේ කොටි පාලනය යටතේ පැවති ප්රදේශ අඩියෙන් අඩිය හමුදා පාලනයට නතු කර ගනිමින් අපේ රණවිරුවන් ගොඩින් දියෙන් බිමෙන් ත්රස්ත ඉලක්ක වෙත පහර පිට පහර එල්ල කළේ ලොව දරුණුතම ගරිල්ලා සංවිධානය ලෙස වහසි බස් දෙඩූ එල්ටීටීඊ යට පමණක් නොව ඔවුන්ට උඩගෙඩි දුන් විදෙස් බලවේගවලටද අමතක නොවන පාඩමක් කියා දෙමින්. යුද හමුදාපති සරත් ෆොන්සේකා, නාවික හමුදාපති වසන්ත කරන්නාගොඩ හා ගුවන් හමුදාපති රොෂාන් ගුණතිලක ත්රිවිධ හමුදාවට නායකත්වය ලබා දුන් අතර එවකට ජනාධිපති මහින්ද රාජපක්ෂ මහතා හා ආරක්ෂක ලේකම් ලෙස කටයුතු කළ ගෝඨාභය රාජපක්ෂ මහතාද මෙම සටනට අවශ්ය නායකත්වය ලබා දුන්නා.
ත්රස්තවාදය පරාජය කිරීම සදහා පොලිසියේ මෙන්ම ග්රාමාරක්ෂක බලකායේ විරුවන්ගෙන් ලැබුණු ශක්තිය ද මිල කළ නොහැකියි. කොටි බලකොටු බිද දමමින් දිවා රෑ දෙකේ අපමණ වෙහෙසක් දරමින් සටන් වැදුන වීරෝධාර රණවිරුවන් කොටි නායක වේලුපිල්ලේ ප්රභාකරන් ඝාතනය කිරිමත් සමග එල්ටීටීඊ ත්රස්තවාදයේ අවසානය නිල වශයෙන් නිවේදනය කළා. ත්රස්තවාදය කිසිලෙසකින් අනුමත නොකළ ශ්රී ලාංකිකයින් මෙම යුද ජයග්රහණයත් සමග සැනසුම් සුසුම් හෙලුවේ ත්රස්තවාදයෙන් ශ්රී ලාංකිකයින්ට සිදු වූ විනාශයන් පිළිබදව පැවති පුළුල් අවබෝධය පෙරදැරිවයි. රටම එක්සේසත් කළ රණවිරුවන් අනාගත පරපුරට නිදහස් රටක් දායාද කළේ මිල කළ නොහැකි රණවිරු ජීවිත දහස් ගණනක් මව්බිම වෙනුවෙන් පූජා කරමින්. එමෙන්ම තවත් රණවිරුවන් විශාල පිරිසක් යුද ගැටුම්වලදී ආබාධ තත්වයන්ට පත් වුණා. මේ සියලු විරුවන් සෑම මොහොතකම අප සිහිපත්කළ යුතු වන්නේ ඔවුන් කළ කැපකිරිම් හා පරිත්යාග කොතෙක්දැයි කිසිවෙකුටත් මිල කළ නොහැකි නිසාවෙනි. ලක් ඉතිහාසයේ රන් අකුරින් ලියැවුනු මෙම රණවිරු ජයග්රහණය අදත් හෙටත් ඒ අයුරින්ම පවතිනු ඇති.
The post යුද බිය නිමාවී අදට වසර 15යි appeared first on ITN News.
