තල්, කිතුල් සහ පොල් ගස් මඳින හා ගෙඩි කඩන අයට ජාතික වෘත්තිය නිපුණතා සහතික ලබා දීමට අනුමැතිය
මෙරට තල්, කිතුල් සහ පොල් ගස් මැඳීම මෙන්ම ගෙඩි කැඩීමේ ආශ්‍රිතව කටයුතු කරන තැනැත්තන් සඳහා ජාතික වෘත්තිය නිපුණතා සහතිකපතක් විධිමත් සති දෙකක පුහුණුවකින් පසු ලබා දීමට අනුමැතිය ලැබී ඇතැයි තල් සංවර්ධන මණ්ඩලය පවසනවා.
ජාතික ආධුනිකත්ව මණ්ඩලය විසින් ලබා දෙන ජාතික වෘත්තිය නිපුණතා -03 (NVQ -3) මට්ටමේ සහතික පතක් මෙරට තල්, කිතුල් සහ පොල් ගස් මැඳීම මෙන්ම ගෙඩි කැඩීම ආශ්‍රිතව කටයුතු කරන සෑම පුද්ගලයෙකුටම ලබා දීමට පියවර ගන්නා බව එම මණ්ඩලයේ සභාපති ආචාර්ය ක්‍රිෂාන්ත පතිරාජ මහතා සඳහන් කළේය.
තල්, කිතුල් සහ පොල් ආශ්‍රිත කටයුතු කරන පුද්ගලයින්ගේ සුබසාධනය වෙනුවෙන් ගනු ලබන පියවර සම්බන්ධව සාකච්ඡාවක් ඊයේ (05) පස්වරුවේ කෘෂිකර්ම හා වැවිලි කර්මාන්ත අමාත්‍යාංශයේ දී පැවැත්වුණා.
කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතාගේ ප්‍රධානත්වයෙන් පැවැති මෙම සාකච්ඡාවේ දී තල්, කිතුල් සහ පොල් ගස් මැඳීම මෙන්ම ගෙඩි කැඩීම ආශ්‍රිතව කටයුතු කරන පුද්ගලයින්ගේ ජීවිත ආරක්ෂාව සඳහා විධිමත් වැඩපිළිවෙළක් යොදන්නැයි අමාත්‍යවරයා තල්, කිතුල් හා පොල් සංවර්ධන මණ්ඩලවල සභාපතිවරුන්ට දැනුම් දුන්නේය.
ඒ අනුව අදහස් පළ කළ තල් සංවර්ධන මණ්ඩලයේ සභාපති ආචාර්ය ක්‍රිෂාන්ත පතිරාජ මහතා එම පුද්ගලයින්ගේ ජීවිතාරක්ෂාව හා සුබසාධනය උදෙසා මෙම NVQ-3 මට්ටමේ සහතික පතක් හා සති දෙකක පුහුණුවක් ලබා දීමට කටයුතු යොදා ඇති බව දැනුම් දුන්නේය.
මීට අදාල පුහුණුව යටතේ ගස් බඩගෑම කරන අවස්ථාවේ හදිසි රෝග තත්ත්වයකට ලක්වීම, සර්ප දෂ්ඨන හා ගසෙන් ඇද වැටීම මගින් පූර්ණ හෝ අර්ධ ආබාධ තත්ත්වයට පත්වීම වළක්වා ගැනීම සඳහා ගතයුතු ක්‍රියාමාර්ග පිළිබඳව පුහුණුවක් ලබා දෙනු ලබයි.
එමෙන්ම මෙම කටයුතුවල නිරතවන පුද්ගලයින්ට ස්වයං රැකියාවක් හෝ ව්‍යවසායකත්ව හැකියා වර්ධනය සඳහා සහන පොලියක් යටතේ රුපියල් ලක්ෂ 05ක ණය ආධාරයක් ලබා දීමට ද මේ වනවිට සැළසුම් කර ඇත.
මීට අමතරව තල්, කිතුල් සහ පොල් ගස් මැඳීම හා ගෙඩි කැඩීම වැනි කටයුතුවල නිරත පුද්ගලයින්ට රක්ෂණාවරණයක් ලබා දීමේ ක්‍රමයක් ඇති කිරීම කෙරෙහි ද අවධානය යොමු කර තිබේ. මේ සම්බන්ධව කෘෂිකාර්මික හා ගොවිජන රක්ෂණ මණ්ඩලය විසින් එම වැඩපිළිවෙළ සකස් කිරීමට යෝජිතය.
මෙහිදී අදහස් පළ කළ අමාත්‍යවරයා මෙම කටයුතුවල නිරත වන බොහෝ පුද්ගලයින් හදිසි අනතුරුවලට ලක්ව ජීවිතය අහිමි වූ අවස්ථාවන් හි දී සහ පූර්ණ ආබාධිත තත්ත්වයන්ට ලක් වූ විට එම පවුල්වල සාමාන්‍ය ජීවිත තත්ත්වයන් මුළුමනින්ම බිඳ වැටෙන බවත් එම තත්ත්වයන් අවම කර ගැනීම සඳහා මෙම වැඩ පිළිවෙළ ක්‍රියාත්මක කරන ලෙසත් උපදෙස් දුන්නේය.
The post තල්, කිතුල් සහ පොල් ගස් මඳින හා ගෙඩි කඩන අයට ජාතික වෘත්තිය නිපුණතා සහතික ලබා දීමට අනුමැතිය appeared first on ITN News.
